الأمثال الشعبية

دي دعوة لي تجميع أكبر عد من الامثال السودانية الشعبية احبتى في الحوش لانو ارثنا السودانى بحتوى على الكثير والكثير من الامثال الشعبية المتداولة البتختلف من بيئة لاخرى ومن منطقة لمنطقة ولكنها بتبقى رصيد ثر فى مكتبة ارثنا الثقافي نتداولها جيل بعد جيل وهى زاخرة بالمعانى الجميلة والقيم النبيلة والعظة والحث على القيم الفاضلة .
الحوشاب الكرام .. كل من لديه امثال سودانية يكتبها عشان نوثق ليها ونجعل من الموضوع دا مرجع لامثالنا السمحة الاصيلة وتوثيق لارثنا وكلام اهلنا الجميل ... وابدى ليكم انا :






التسوي كريت تلقى في جلدها

جلداً ما جلدك جر فيهو الشوك

الخير تجقلب والشكر لي حماد
الخير في المنعول زي الشرا في القندول
حليل امات طه
المي الحار ترا ولا لعب كعونج
خربانة ام بناية قش
الما دارك ما خربشك
جارك القريب ولا ود امك البعيد
كان كترت عليك الهموم ادمدم نوم
دار ابوك كان خربت شيل ليك منها شيلة
اتنين كان قالوا ليك اضانك مافى اهبشها
لالوب بلدنا ولا تمر الناس
بليلة مباشر ولا ضبيحة مكاشر
الجمرة بتحرق الواطيها
البباري الجداد بودي الكوشة
الخيل تجلقب والشكر لي حماد
مساك الدروب ضهاب
سواي القلوب كضاب
ركاب السروج وقاع
ودي كلها في رائعة المبدعين
الما شاف البحر تخلعو الترعة
الطشاش فى بلد العمى شوف
الماعندو قديم ماعندو جديد
والنسا قديمو تاه
دقانى وبكا سبقتى اشتكا
رزقا تكوسو رزقا يكوسك
الشقى يلقى العظم فى الكبدة
الواقعة من السما بتحملها الواطا
العود كان مافيه شق مابقول طق
اب سنة بضحك على اب سنتين
القفة ام اضنين بشولوها نفرين
جارك القريب ولا ود امك البعيد
النسيبة عين شمس
الصابر يعرس مرة راجل
التسوى كريت فى القرض تلقاه فى جلدها
قلِ العروض جفا
الزارعه الله فى الحجر بتقوم
حلم المطلقة فى الرجوع
بليلة مباشر ولا ضبيحة مكاشر
بيت الجدرى ولا بيت النقرى
الكحل مابنفع فى العين الحجر
الماشفتو فى بيت ابوك بخلعك
الشينة منكورة
الواضح مافاضح
العرجة لى مراحا
سيد الرايحة بفتح خشم البقرة
الببارى الجداد بوديهو الكوشة
المرة بدقوها باختها
الماعندو لسان فقرى وفلسان
فى الوش حبايب وفى القفا دبايب
سمحة البتعرّف
البرقص مابغتى دقنو
الماعندو ضهر بينضرب على بطنو
عيب الزاد ولا عيب سيدو السترة والفضيحة متباريات
البحر بشيل عوامو
القلم مابزيل بلم
بخيت شكروه قال داك شهر تاني
هو حساب ولا كوار
مارق للربا والتلافي
ختوه قرض
خربانة من كبارها
خلى خشمو ملح ملح
خلى ريحتو طير طير
الخواف ربى عيالو

هووووووووووووي ارعى بقيدك

الاخ العزيز/ بلاحدود
أندي التحايا لك
وما خليت لينا حاجة
وهاك الاضافة دي
الخواف ربى أولاده :
الذي يخشى العواقب تطول حياته فيقوم بتربية أولاده بدنا بالغذاء وعقلا بالتعليم – يضرب في الحذر من التورط في المخاطر

الخيروه حيروه :
من خير بين أمرين متساويين أوقعوه في حيرة لان المتساويين يصعب التمييز بينهما

دخانكم يدخن وجوعكم يمحن :
ترى الدخان من المطبخ و تشم الرائحة والدار يعمها الجوع بظهور اثره على اجسام افرادها وشكاوى ضيوفها

راحت شمار في مرقه :
ذهبت بلا فائدة كما تذهب فائدة الشمار عندما يوضع في المرق يضرب تحسرا

رأسه ضارب :
كناية عن الحيرة في توجيهه توجيها حسنا

زي الدنيا :
مثل الدنيا في تقلب الأحوال
سجمان ورمدان :
السجم هو ما يعلق بالقدر والسقوف من اثر الدخان والرماد ما يبقى من تحويل المادة التي تأكلها النار – يضرب ذما للخاسر من الناس وكلمة سجم يراد بها الدعاء عليه او وصفه بالخاسر

أرجى سفيه و لا ترجى باطل :
انتظر السفيه ليعقل ولا تنتظر الباطل لينعكس ( السفيه من يصرف أمواله في ملذاته و لا يلتفت إلي واجباته الدينية والادبيه أما الباطل فهو الذي يكون عالة على غيره

عينك للفيل وتطعن فى ضلو
والجن بداوة كعبة الاندراوة بلا حدود (( الاندراوة )) دي انا ما عرفتها عارف معناها شنو ؟
سرارة اللعوت تتلاقى يوم الموت :
قرابتكم كقرابة شجر اللعوت ما تلتقي أعواده إلا عند حرقها بعد قطعها كذلك انتم لا تلتقون إلا عند وفاة أحدكم في الصلاة عليه – يضرب في المبالغة في الجفا
وتحياتي

ابـــــــــــداع وهاك الاضافة دي
الاخ العزيز/ بلاحدود
أندي التحايا لك
وما خليت لينا حاجة
وهاك الاضافة دي

كما تقولين اختى سميه لكي اندى التحايا واعطرهاولك الشكر اجزله على الاضافات في الامثال السودانيةفهي احق ان توثق حتى لا تضيع مع الزمن وننتظر منكِ الكثير الكثير لكِ ودي بلا حدود

جقلو ولا مشي اعرج
الجقلو هي الارض غير المستويه

جراده في الكف ولا الف طايره

لالاوب بلدنا ولا تمر الناس

السعن المليان ترى ولا بجلبق

من يزيد من مكتبة التوثيق في مجال الأدب والشعبيات له في خاطري تحية خاصة
ذلك لان الأصل هو الأصل والموروث الثقافي والشعبي هو أصلنا الذي نفتخر به عبر الأجيال القادمة فخراً وتبجلاً

لكي مني اعمق تحية اختي الشقيقة ريد روز وواصلي كفاحك


بلا حدود

الواقعة من السما بتحملها الواطا

المثل دا عاجبني بشكل ....

فيهو دلالة عن الثبات على تحمل القدر والاقدار طبعا موجودة مع الانسان

السواى ماحداث
ايدك كان مدهنه قشها فى اخيك
الراح راح والمعوض الله وكتين يكون الضراع أخضر بملأ من تاني ويشيل بس النية تكون بيضاء

النيه زامله سيدااا
البتسوي بايدك يغلب اجاويدك
الخير تجغلب والشكر لي حماد
الماعندو كبير اشوف ليهو كبير
العب الضلع من شلوفتو

والله يا صيلة صحي كلامك
السواى ماحداث

صدقتي وحاااااااة الله
والعرجة لي مراحا ....

النية زاملة سيدا

ولكل امرئ ما نوي


ليك عمييييييييق الشكر

جداده الخلا الطردت جداده البيت
الفيك بدربو

القلم مابزيل بلم

الجمره بتحرق الواطيها
مجبوره كريت على التدورو والتابا راجل امها تقول ليهو يابا

المشاركة الأصلية كتبت بواسطة فاطمه

الجمره بتحرق الواطيها
مجبوره كريت على التدورو والتابا راجل امها تقول ليهو يابا

ريد روز ما تقيفي باقي كلامك حكم

فاطنه
شكرا على الاضافة خاصة مجبور كريت على التدورو والتابا راجل امها تقول ليهو يابا

دا جبتيهو من وين هههههههه

الطشاش في بلد العمي شوف . الطشاش هو الشوف القليل ويضرب هذا المثل في حالة ان يكون شخص يملك امكانات تعتبر بسيطه وفي نفس الوقت كبيره عند اخرين . يعني مثلا بنت متوسطة الجمال تكون وسط الجميلات لاشئ ولكنها تكون ملكه وسط القبيحات .
ـ الباب البجيب الريح سدو واستريح . واضح
ـ الطول طول نخله والعقل عقل سخله . والسخله هي المولود الصغير من الماعز .
ـ من فوق صوره ومن تحت قرقوره . يضرب لمن لا تمثل ظواهره دواخله .
ـ من بره هله هله ومن جوه يعلم الله . نفس المثل السابق
ـ البحر بياخد عوامو . او يشيل عوامو . يعني دائماً يغرق من يجيد العوم . والحرفا دائما يضيعون ضربات الجزاء عند الرياضيين . يغرق البعرف يعوم ويرسب الحاضن الكتاب وينجح الطول السنين عداها نوم .
ـ المريسه ما بتلقى شرابا . يضرب لمن كان يشغل منصباً وهو غير كفؤ وهناك من هو اجدر منه بهذا .
ـ دي زمانا فات وغنايا مات . يضرب لانتهاء عصر الشئ

ـ خريف ابو السعن صرفه وجراد . ابو السعن طائر كبير له جراب في رقبته يشبه السعن , والسعن هو قربه صغيره من جلد الماعز والضان , والصُرفه بضم الصاد هي ديدان ويرقات حشرات تظهر في الخريف ياكلها ابو السعن , ويضرب لمن وجد خيراً كثيراً .
ـ ام جركم ما بتاكل خريفين . ام جركم هي نوع كبير من الجراد , والجراده كما تعلمون لاتعش اكثر من جيل واحد يعني تبيض وتموت بعد البيض مباشرةً , كما قال الشاعر : الولدت بكر ما درجت طفلان .ويضرب لمن قصر عمره ولا ينال اكثر مما وجد .
ـ غشيم جراده . ويطلقون الغشامه على الجراده لانها اكثر الحشرات وقوعاً في النار . ويقولون ايضاً غشامة ابو الدقيق .
ـ الغالي بي غلاتو يضوقك حلاتو والرخيص بي رخصتو يضوقك مغصتو .يعتقدون ان الشئ الغالي دائماً جيد والرخيص دائماً سئ .
ـ ما في نجيبه مرقت من زريبه . النجيبه هي البهيمه الجيده , ويقولون ايضاً الوجيبه وهي تدخر وتوجب للظروف وعند الحوجه . ودائماً يضربونه اهلنا لمن اراد ان ينزوج خارج اهله او بنات عمه . ويقصدون ات هذه البنت لو فيها خير وجيده لما رضي اولاد عمها تزويجها لك .

جابوا فزع بقى وجع . يضرب على من اتو به ليحل مشكله فزادها او اصبح هو المشكله , زي تيس نفيسه جابو يعشِر الغنم ( يحسن نسلها ) رضعن .
ـ ما تدخل بين القرفه وعودا. القرفه هي اللحاء الذي يغطي ساق الشجره ويضرب على من يتدخل في امور الاهل اذا اختلفوا . وكما يقول المصريين ياداخل بين البصله وقشرتها ما ينوبك الا ريحتها .
ـ المبلوله ما بتخاف من الرشه . والرشه هي المطر الخفيف اورش الماء باليد , ويقولون ايضاً الاتبلل يعوم , ومنها الاكل بصل يكتر , لان رائحة قليله وكثيره واحد .
ـ سفراً بالايد مو بعيد . ويقال دائماً عند ان يطلب منك أحد ان تقترب من صحن الاكل .
العينو في راسو بعرف خلاصو . ان الانسان على نفسه بصيرا , ويضرب لمن يريد ان يجاذف , او وقع في مأذق ويريد ان ينحل منه والناس لم ينووا مساعدته .
ـ الكلب ينبح والجمل ماش . الجمل لا يخاف من نباح الكلاب ولا يلغي لها بالاً , ويضرب في حالة عدم الاهتمام باراء الاخرين المصبطه او الحاقده .
ـ البحر رايق والقعوي متضايق . القعوي هي الضفادع تصدر اصواتها عند هدوء البحر , ويضرب لمن يثير مشاكل الاخرين والاخرين انفسهم لم يهتموا بها , او اذا كان احد الطرفين يثور والطرف الاخر بكامل هدوءه .
ـ دوّار جمل نسيبتو , ان لقاهو يغني وان مالقاهو يغني . يضرب لمن لاهم له , ولا يكترث بمسئولياته .
ـ كان كترت عليك الهموم ادمدم ونوم . من امثال وداب ذهانه , الغير مسئوله ومنها نوم الضحى بطول العمر

الفقره اتقسموا النبقه . يضرب للحث على اقتسام البسيط . والتعاون الاجتماعي وحب الخير للاخرين ,
ـ المفقوع يبكي برا دموع . يضرب في حالة الخداع في البكاء ,
ـ ضربني بكا وسبقني اشتكا . يضرب في حالة الظالم الذي يظهر في صورة المظلوم .
ـ ما تشكر لي الراكوبه في الخريف . الراكوبه عندما يصب المطر لاتقي ساكنها كاملاً من المطر ’ ويضرب في حالة الناس الذين لا مواقف لهم , ولا تجدهم ساعة الحاجه لهم .
ـ كان سرقت اسرق جمل وان عشقت اعشق قمر . يرى البعض انه اذا اصبحت حرامي فاضل ان يمسكوا عليك وانت تسرق شئ يستاهل التهمه ولا خير فيك ان قبضوا عليك وانت تسرق الدجاج في الحله . كما قال ود ضحويه : واجدين في الفريق بالقمري وجنا الجداد رضوهن
وواحدين خمشوا الكلوسه وبالفيافي مغوهن
كم زملاً كبار من بلد الانجليز جابوهن
وقفن زومه يا حسن العليقات جوهن
الضو ما بقولولوا سو ـ الضو هو الرجل الناجح وهو ضو القبيله . سو هو فعل امر من سوى أي افعل كذا , ويضرب في حالة من بيده الحل والربط , او عندما يغلط احد ويلوم الناس بانهم لم يوجهونه .
ـ حكاية اللبن الشقّ السعن , يضرب في صاحب المال الذي يفعل الفعائل ليتباهى بماله .
ـ الضُبان تبع الليان . الضبان هو الذباب وهي حشره توجد اين ما وجدت الاوساخ . ويضرب في من تتبع الرزايا .
ـ القلم ما بزيل بلم , البلم هو الغباء والجهل , ويضرب للمتعلمين الذين ياتون بافعال سيئه لا يقبلها العقل ولا الناس .
ـ الفي ايدو القلم ما بكتب نفسو شقي . يعني ان المسئول ياخذ حقه كاملاً ولو كان غير مستحقاً .
ـ الباع بلادو اخيرلو النجعه بي اولادو . البلاد هنا هي ارض الزراعه المطريه . وهي رمز انتماء النسان بارضه , ويضرب للنهي عن بيع الارض ومن باع ارضه افضل له ان ينجع عن البلد ويشوفلو بلد تانيه , وياليتها تطبق للوطن الكبير .

جبل الكحل هدنوا المراويد . الكحل معروف ’ والمراويد هي ادوات التكحيل اي انها توضع في الكحل ثم تمرر على العين ’ هدنوا اي جعلنه مهدوداً ’ ويضرب في حالة ان الاشياء البسيطه اذا توالت فعلت فعلها في الاشياء الكبيره ,
ـ الدين زي جبل العطرون , الدين بفتح الدال هو الاستلاف , والعطرون نوع من الحجاره له محتوى عالي من الكربونات , ويستخدم في الطهي وله المقدره على هرس السيليلوز في الخضروات كالملوخيه والباميه والسبروق ويضرب لصاحب الدين بانه اذا دفع منه كل مره جزءاً لخلص من الدين ,
ـ الما بتلحقو جدعوا , جدّعو اي ارميه بالحجاره , ويضرب للكسالى او المحبطين عندما لم ينجحوا يقللوا من شان الناجحين , والشئ الذي لا تلحقه بيدك لابد ان ترميه بالحجاره لتنال منه ,
ـ البصله المعفنه بتعفن الباقي , اذا كان وسط البصل واحده مصابه بالعفن الفطري فان الفطر ينتشر بسرعه وخاصه في البصل ويصيب الابصال السليمه , ويضرب غالباً في حاله التحذير من البنات ذوات الاخلاق الرزيله وابعاد البنات الطيبات منهن خوفاً عليهن من الختلاط بهنّ .
ـ عيال ام خير خيارن خير والخلاء اخير من خير . ام خير هذه امراه لها سبعة اولاد وخيرهم من اسمه خير ولكن الخلاء احسن من خير هذا , يضرب في حالة الولاده البايظه , وكما يقول اهلنا : اللهم اكفنا شر الولده الخاسره والبيعه الكاسره .
ـ يقولوا ليه تور يقول احلبوا . يضرب في حالة عدم الفهم والتركيز في حديث المحدث , اي ان يشرح لك شخص شئٌ معين وتسال في نفس الشئ .

والله يا زهير ما قصرت تب ويوم شكرك ما يجي
امثال شعبية وبي شرحها كمان ؟؟؟؟

بس تعرف العجبني يا مثل ؟؟؟




الضو ما بقولولو سو

يا حافر حفرت السوء وسع مراقدك فيها
ويطلق للذى يريد ان يحيك لك مكيدة
وهى على الباغى تدور الدوائر

ــــــــــــــــــ
الخريف من نترته والصبى من تبته
بمعنى ان الخريف من بدايته يعرف ان كان ناجح ام لا والصبى الولد الشاب ومن تبته يعنى من انتصابته عند القيام من الارض فيقف بسرع ونشاط
وليس بتكاسل
ــــــــــــــــــــــــــــ
البدوره والبتاباه تكوس لى لمته ما تلقاه
ـــــــــــــــــــــ
الدابى اكان فى خشمه جرادة ما بعضى
ويطلق هذا المثل للشخص الماسك عليه زلة او معطيه رشوه
الدبيب طبعا عندما يكون يبتلع فى شىء لايستطيع ان يعضى
ـــــــــــــــــ
دا شعرا ما عندى ليهو رقبة
يطلق للامر الذى لاتستطيع ان تفعله او فوق مقدرتك
ـــــــــــــــــــــ
كان جريت جرى الوحوش غير رزقك ما بتحوش

ــــــــــــــــــــــــــــــ
انا واخوى على ابن عمى وانا وابن عمى على الغريب
ـــــــــــــــــــــــــــــــــــــــــ
المرة كان فاس ما بتكسر الراس
ـــــــــــــــــــــــــــــــــــــ

الضايق قرصت الدبيب يخاف من جر الحبل
ــــــــــــــــــــــــــــــ
الجفلن خلهن اغرع الواقفات
ـــــــــــــــــــــــــ
منعوها من الزواعة باتت بره
ــــــــــــــــــــــــــــــ
علمناهم الشحده سبقونا على الابواب
ـــــــــــــــــــــــــــــــــ

القرد فى عين امه غزال
ــــــــــــــــــــــــــــــ
كل زول عاجبو الصاريهو
ـــــــــــــــــــــــ
يد على يد تجدع بعيد
ــــــــــــــــــــــــــــــــ
الصابر بعرس مرت راجل
ــــــــــــــــــــــــــــــ
المتحرى ولا المتعشى
ـــــــــــــــــــــــــــــــ
خادم الفكى مجبورة على الصلاة
ـــــــــــــــــــــــــــــــــــــ
المكتوب على الجبين لابد تشوفو العين
ــــــــــــــــــــــــــ